Deportes

A proba, organizada por Gallaecia Raid coa colaboración do Concello, sairá ás 10.00 horas dende Ledoño e contará con dúas distancias de trail e unha andaina

Culleredo volverá converterse este domingo, 21 de decembro, nun punto de referencia para o deporte ao aire libre coa celebración do XII Trail e Andaina de Orientación, unha cita organizada por Gallaecia Raid que conta coa colaboración do Concello.

A competición reunirá a máis de 250 participantes e dará comezo ás 10.00 horas en Ledoño. O evento inclúe dúas distancias de trail, pensadas para distintos niveis de esixencia, ademais dunha andaina orientada a quen prefira unha participación máis popular e accesible.

Desde a organización destacan o carácter deportivo e de convivencia desta proba, que combina actividade física e orientación nun percorrido polo entorno natural do municipio.