Máis de 1.300 persoas confirman a súa participación na Carreira Popular do Ventorrillo
A Coruña celebrará este domingo a Carreira Popular do Ventorrillo, a penúltima proba do circuíto Coruña Corre 2025, que encara xa a recta final da tempada antes do peche en Novo Mesoiro no mes de novembro. Máis de 1.300 persoas teñen confirmada a súa asistencia e a inscrición atópase xa pechada, segundo informou o Concello.
A carreira absoluta, de algo máis de cinco quilómetros, sairá da rúa Alcalde Salorio Suárez e combinará treitos de asfalto con pistas de terra, percorrendo o barrio do Ventorrillo e a zona alta da Silva. Ademais da proba absoluta, o programa inclúe as carreiras de base, desde a categoría sub-18 ata peques, con saídas graduais entre as 11.15 e as 12.30 horas, e percorridos adaptados á idade das e dos participantes.
As persoas inscritas poderán recoller o dorsal o propio domingo desde as 9.00 horas no local da Asociación de Veciños do Ventorrillo (rúa Alcalde Salorio Suárez, 26, baixo). A organización habilitará servizo de duchas no polideportivo municipal do Ventorrillo ata as 13.00 horas, así como gardarroupa no local veciñal. A entrega de premios está prevista a partir das 13.00 horas na praza Salvador de Madariaga.
Na clasificación xeral do circuíto Coruña Corre 2025, chegan como líderes absolutos Antón Gómez López e Inés López Alfonso. Tras cinco carreiras disputadas, Gómez encabeza a táboa masculina por diante de Daniel Fuentes Bardanca e Paulo Cameselle Juiz, mentres que na categoría feminina López Alfonso mantén o primeiro posto seguida de Noelia Souto e Inés Papín.
Co gallo da carreira, a Policía Local activará un dispositivo especial de tráfico no percorrido. Entre as 7.00 e as 14.00 horas pecharase a rúa Alcalde Salorio Suárez no tramo entre Alcalde Jaime Hervada e Mosteiro de Caaveiro. Ademais, entre as 9.45 e as 10.30 horas restrinxirase a circulación en Mosteiro de Caaveiro (entre Alfredo Tella e Alcalde Liaño Flores) e en Alcalde Jaime Hervada (entre Liaño Flores e Pintor Francisco Miguel).