Lucía Doval e María de los Ángeles Rodríguez levan tres ouros estatais para o atletismo vencellado a Ordes
O atletismo con selo ordense volveu deixar pegada a nivel estatal. Lucía Doval Sánchez e María de los Ángeles Rodríguez del Río foron dúas das grandes protagonistas do Campionato de España de Lanzamentos Longos Máster, disputado en Durango, ao conquistar tres títulos nacionais entre ambas e confirmar o gran momento que atravesan nesta primeira parte da tempada.
Lucía Doval asinou un campionato impecable na categoría F50. A atleta de Atlética A Silva proclamouse campioa de España en disco de 1 quilo cun lanzamento de 23,82 metros e repetiu ouro en xavelina de 500 gramos grazas a unha mellor marca persoal de 28,58 metros. Pola súa banda, María de los Ángeles Rodríguez tamén subiu ao máis alto do podio en xavelina F65 cun rexistro de 21,86 metros, unha marca que ademais lle valeu para establecer un novo récord do campionato.
Os resultados dan continuidade ao bo arranque de curso das atletas vinculadas a Ordes. Xa no campionato galego de lanzamentos longos máster disputado en Lugo a comezos de febreiro, Lucía Doval lograra outro dobrete en disco e xavelina, mentres María de los Ángeles Rodríguez tamén se fixera co triunfo en xavelina. A actuación en Durango reforza así o peso competitivo dun grupo que segue sumando medallas e situando o nome de Ordes entre os máis destacados do atletismo máster galego.