Deportes

A cita celebrada no pavillón sadense reuniu máis de 500 deportistas e deixou tamén resultados destacados para clubs da Coruña, con ouros, pratas e bronces en varias categorías

O Pavillón Municipal de Sada converteuse no epicentro galego do Brazilian Jiu-Jitsu coa celebración da Copa de Galicia 2026 CUP BJJ, unha proba do Spain BJJ Tour que superou os 500 competidores e moveu arredor de 2.000 persoas entre participantes, familiares e organización. A dimensión do evento confirmou a capacidade do recinto sadense para acoller competicións de primeiro nivel autonómico e estatal.

Na clasificación por academias absolutas, Lotus BJJ España foi a gran dominadora da xornada, ao conquistar o primeiro posto tanto en GI con 1.049 puntos, por diante de Focus Jiu-Jitsu España e The Boss, como en NO-GI con 751 puntos, seguida de Crazy Team e Narcisio Villaça Team. Nas categorías de base, o protagonismo pasou a Narcisio Villaça Team, que se impuxo en xuvenís con 563 puntos, por diante de BJJ Pretorian Johan Sifontes e Adamas BJJ, e tamén en kids, con 510 puntos, por diante de Alpha Wolf Pack e Titanes BJJ.

Entre os resultados máis relevantes da contorna destacou o papel de Fit And Fight Titanes, equipo con sede na Coruña, que ademais logrou esa terceira posición na clasificación kids. A súa deportista Sabela Ventoso Mazas proclamouse campioa en Kids Girls GI, cinto branco, Infanto Xuvenil A de menos de 54 quilos. Nesa mesma canteira, David Val Filgueiras foi prata e Hugo Medina Salgado bronce en Kids Boys GI, cinto branco, Infanto Xuvenil B de menos de 64 quilos. Xa en categoría absoluta, Juan Alonso Barrientos Meza conseguiu a prata en Male NO-GI, cinto azul, adultos de menos de 62 quilos.

Tamén deixou unha actuación sólida o CFC Team, academia asentada na Coruña, con varios podios na competición. Juan Gudin Cruz foi segundo en Male GI, cinto branco, adultos de menos de 68 quilos, e Rodrigo Bouzada tamén rematou subcampión en Male GI, cinto branco, adultos de menos de 80 quilos. A estes resultados sumáronse a prata de Diego Sánchez Juan en máster 2 de menos de 92 quilos e varios bronces, entre eles os de José Molla e Jorge Ramírez nas súas respectivas categorías.

A Copa de Galicia pechouse así cun dobre balance positivo para a área. Por unha banda, Sada consolidouse como sede dun evento capaz de atraer centos de deportistas e público. Pola outra, clubs da Coruña conseguiron abrirse paso entre os mellores dunha cita que reuniu boa parte do panorama competitivo do noroeste.