Losán eleva a presión sobre a Xunta cun aviso de fondo: 200 empregos seguen pendentes dunha saída urxente
A crise de Losán entra nun momento decisivo en Curtis e Vilasantar. O comité de empresa reclamou este venres, 27 de marzo, á Xunta a convocatoria urxente dunha mesa negociadora na que se senten Administración autonómica, SEPI, dirección e representación sindical, coa idea de buscar unha saída inmediata a unha situación que, segundo advirte, pon en risco arredor de 200 empregos directos en Galicia.
A representación do persoal sitúa o 29 de abril de 2026 como unha data límite e alerta de que a incapacidade da compañía para sacar adiante o seu plan de reestruturación deixa o futuro da actividade nun punto crítico. Nese escenario, o comité insiste en que fai falla unha intervención directa das administracións para abrir un espazo de negociación real e evitar que o conflito siga cronificándose.
O malestar da plantilla non se limita á falta de certezas sobre o futuro industrial. Os sindicatos denuncian tamén meses de atrasos salariais e reprochan á dirección que, nas reunións mantidas nas últimas semanas, non puxese sobre a mesa un plan detallado nin un calendario de pagos que permita recuperar a confianza. Esa mesma falta de transparencia xa foi motivo de mobilizacións recentes en Teixeiro e noutras protestas promovidas polo persoal afectado.
No comité medra a sensación de que non existe, hoxe por hoxe, un proxecto sólido para garantir a continuidade das fábricas galegas. A súa lectura é que a empresa está máis centrada en gañar tempo e protexer os seus intereses que en presentar unha folla de ruta industrial con percorrido para as plantas de Curtis e Vilasantar.
O conflito transcende ademais o ámbito estritamente laboral. En comarcas cun forte vencello coa actividade forestal e madeireira, a posíbel perda de emprego en Losán reabre o temor a un novo retroceso industrial no rural coruñés. Mentres o Goberno central mantén contactos con entidades financeiras, coa Xunta e con outros actores para evitar a quebra do grupo, o persoal pide que esa vía negociadora se traduza xa en decisións concretas.