Julio Abalde escolle Curtis para a súa primeira visita institucional como subdelegado do Goberno na Coruña
O subdelegado do Goberno na Coruña, Julio Abalde, realizou o venres 16 de xaneiro a súa primeira visita institucional ao Concello de Curtis, onde foi recibido polo alcalde, Javier Caínzos, e por membros da corporación municipal. No encontro, Abalde asinou no Libro de Honra e deixou constancia de que era a súa primeira visita no cargo, aínda que xa coñecía o municipio doutras etapas da súa traxectoria.
Tal e como recolleu no propio Libro de Honra, Abalde sinalou que para el era ‘un verdadeiro honor’ volver a Curtis mantendo relación coa vila desde anteriores responsabilidades, lembrando a súa vinculación cando foi reitor da Universidade da Coruña.
Durante a visita, o subdelegado destacou o modelo de desenvolvemento do concello, no que conviven unha forte actividade industrial e o peso da agricultura e da gandaría. Segundo subliñou, esa compenetración entre sector primario e industria ‘contribúe de maneira decisiva’ ao progreso presente e futuro tanto da provincia da Coruña como de Galicia.
A axenda completouse cunha xuntanza de traballo na que tamén participou o coronel xefe da Comandancia da Garda Civil da Coruña, Fernando Pedreira, xunto con representantes do goberno local. Na reunión analizáronse cuestións de actualidade municipal, con especial atención á seguridade cidadá nun concello sen corpo de policía local, onde as funcións de protección recaen na Garda Civil.
As partes abordaron vías para mellorar a coordinación entre Concello, Garda Civil e Subdelegación e repasaron a evolución dos procedementos policiais, incluíndo a posibilidade de realizar trámites como a interposición de denuncias por Internet. Tamén se tratou o cambio na tipoloxía delituosa, cun descenso dos delitos tradicionais e un aumento da ciberdelincuencia, mantendo datos de criminalidade semellantes.
Abalde remarcou que ‘A Coruña é unha provincia moi segura’ e que Galicia é a terceira comunidade do Estado en seguridade. A visita pechouse co compromiso de reforzar a colaboración institucional para seguir mellorando os bos indicadores do municipio e da comarca.