Juan Ignacio Cirac, referente mundial en física cuántica, visita Galicia para falar sobre a revolución cuántica
Juan Ignacio Cirac, un dos científicos máis influintes no campo da física cuántica, impartirá unha conferencia na Cidade das TIC o vindeiro 17 de decembro. O evento, organizado pola Fundación Empresa-Universidade Galega (Feuga), busca xerar un espazo de diálogo e reflexión sobre os avances en innovación, ciencia e liderado.
Cirac, director do Instituto Max Planck de Óptica Cuántica en Alemaña desde 2001, é coñecido polas súas contribucións pioneiras na teoría dos ordenadores cuánticos, xunto con Peter Zoller, durante os anos 90. O seu traballo foi recoñecido con numerosos premios, entre eles a Medalla de Excelencia Científica do CSIC.
Na súa relatorio titulada “Tecnoloxías cuánticas: ¿estamos listos para elas… ou elas para nós?”, Cirac explicará de forma accesible como estas tecnoloxías permitirán realizar cálculos complexos que actualmente están fóra do noso alcance, con aplicacións no deseño de fármacos, novos materiais e a optimización de procesos industriais.
Ademais, o acto incluirá un espazo de preguntas e diálogo co público, onde os asistentes poderán intercambiar inquedanzas e consultas directamente cun dos líderes internacionais nesta área.
A conferencia celebrarase ás 12:00 horas na Cidade das TIC e o aforo é limitado. As inscricións están abertas na páxina web de Feuga (www.feuga.es).