José Montaña Louzao e Pablo Escudero Abenza gañan o Premio Torrente Ballester da Deputación da Coruña
O XXXVII Premio Torrente Ballester de narrativa, convocado polo departamento de Cultura da Deputación da Coruña, xa ten novas voces gañadoras. Na modalidade en galego, o xurado escolleu como vencedora a novela 'Non hai paz no paraíso', do escritor betanceiro José Montaña Louzao. Na categoría en castelán, a obra premiada foi 'Biblioteca familiar', do autor Pablo Escudero Abenza.
O Torrente Ballester, consolidado como un dos premios literarios de referencia no ámbito estatal, mantén a súa aposta pola excelencia narrativa nas dúas linguas oficiais. O galardón está dotado con 15.000 euros, que serán repartidos a partes iguais entre os dous autores.
Na modalidade en galego, o xurado integrado por Ismael Ramos, Lara Dopazo, Ana Varela, Manuel Esteban e Loli Rodríguez (gañadora da pasada edición) subliñou de 'Non hai paz no paraíso' o coidado estilístico e unha linguaxe especialmente rica en matices. A novela propón un percorrido histórico pola sociedade galega da primeira metade do século XX, construído a través de personaxes poliédricos que reflicten a complexidade política e social da época.
Pola súa banda, o tribunal da modalidade en castelán, formado por Carmen G. Magdaleno, Raquel Delgado, David Uclés, Andrea Fernández Plata e José Antonio Bonet (gañador do ano anterior), destacou en 'Biblioteca familiar' a honestidade do relato, o seu carácter híbrido entre ficción e ensaio e unha prosa limpa e fluída. Segundo o ditame, trátase dunha obra que funciona como declaración de amor á literatura, invita a ler e a escribir e ofrece ao mesmo tempo unha reflexión ampla sobre o mundo editorial e a industria cultural.
No apartado biográfico, José Montaña Louzao, natural de Betanzos, é catedrático de Lingua Galega e realizou estudos de Dereito e Filosofía na Universidade de Santiago de Compostela. Conta cunha sólida traxectoria literaria na que figuran títulos como 'La última isla', 'As armas delicadas', 'Pancarta para Xulia' ou 'O tesouro de Catoira', ademais de relatos, crónica novelada, ensaio e libros de viaxes.
Pablo Escudero Abenza é licenciado en Ciencias Físicas pola Universidade Complutense, especializado en Física Fundamental. Ao longo da súa carreira literaria foi recoñecido en certames como Jóvenes Talentos de Brooket e Ámbito Cultural, o Premio Ciudad de Alcalá de Narrativa ou o Certame de Creación Joven del Injuve en Narrativa. Entre as súas obras editadas destacan 'Beber durante el embarazo', 'Mil dolores pequeños', '¡En el rincón de la derecha...!' e 'Las medallas de mercurio'.