Jorge Álvarez Mosteiro, campión de dobres nun Torneo Tennis Europe en Sanxenxo
O tenista oleirense Jorge Álvarez Mosteiro proclamouse campión de dobres no 17º Torneo Internacional Cadete de Sanxenxo – Fuente Liviana, proba do Tennis Europe Junior Tour (U16). Xunto ao portugués Duarte Santa María, impúxose na final a Julen González e Sergio Prádanos por 6-1 e 6-3 nas pistas do Círculo Cultural e Deportivo de Sanxenxo.
O éxito supón un novo impulso para a súa traxectoria formativa, con puntos valiosos no circuíto internacional cadete e proxección para vindeiras citas. Ademais, súmase á boa tempada de Álvarez Mosteiro, que xa fora campión cadete do AS Young Tour by IBP disputado no Club de Tenis Coruña o pasado mes de agosto. O Concello de Oleiros felicitou o deportista polo título e polo seu papel como embaixador do deporte de base do municipio.