Cultura

O escritor friolés levou o sábado 11 de abril á cidade herculina a súa segunda novela, unha historia ambientada en Friol que afonda nos reencontros, a nostalxia, o TOC e a memoria emocional dos anos 90

A Fnac da Coruña acolleu este sábado, 11 de abril, a presentación de 'El verano que volvió Sherezade', a segunda novela de Jordi Cicely, nun acto que reuniu unha gran afluencia de público e que confirmou o interese que está a espertar a nova obra do autor friolés. O encontro converteuse nunha cita moi participativa arredor dun libro que chega avalado por unha historia de amor, nostalxia e obsesión.

Cicely estivo acompañado polo escritor coruñés Hugan C. Pekiar, con quen mantivo unha conversa centrada no TOC, tema nuclear dunha novela que sitúa a súa acción en Friol e segue o regreso de Jairo ao seu lugar de orixe, onde se reencontra cos amigos da mocidade e cun amor imposible de hai vinte anos.

Durante a presentación tamén houbo espazo para falar doutros fíos que atravesan o libro, como o paso do tempo, os reencontros, a música dos 90 e a propia pegada de Friol no relato. A resposta do público foi tan positiva que se venderon todos os exemplares dispoñibles na tenda, pechando así unha cita literaria marcada pola proximidade co lector e polo interese que espertou a historia.