Isabel Risco leva o seu espectáculo ‘Nabiza Girl II’ ao Salón Multiusos de Curtis
O Recinto Feiral de Curtis acollerá este día 7 ás 21.00 horas o espectáculo ‘Nabiza Girl II’, da actriz e humorista Isabel Risco. Trátase da continuación das aventuras da superheroína máis galega e irreverente, un personaxe que combina teatro, performance e humor para ofrecer unha proposta cargada de enerxía, sátira e reivindicación.
Nesta nova entrega, Nabiza Girl regresa con toda a súa forza para denunciar as inxustizas e defender a identidade e o orgullo galego cun estilo propio e moi persoal. Isabel Risco, recoñecida pola súa capacidade para conectar co público a través da retranca e a crítica social, promete unha noite de risas e reflexións a partes iguais.
A cita terá lugar no Salón Multiusos do Recinto Feiral de Curtis e está dirixida a todos os públicos que queiran gozar dunha proposta teatral fresca, divertida e cun marcado selo galego.