Invístense 1,6 millóns de euros na rehabilitación do CEIP Pedro Barrié de la Maza en Sada
A Xunta de Galicia destina 1,6 millóns de euros á rehabilitación integral do CEIP Pedro Barrié de la Maza, situado en Sada. Esta actuación, enmarcada na segunda fase do Plan de nova arquitectura pedagóxica, busca mellorar a eficiencia enerxética e a funcionalidade dun dos principais centros educativos da zona.
Entre as intervencións previstas inclúense o illamento térmico de 2.767 metros cadrados de fachada mediante o sistema SATE, a renovación de máis de 2.700 metros cadrados de cuberta con panel sándwich de aceiro e poliuretano e a modernización de baixantes e verteaugas. No interior, instalaranse falsos teitos acústicos, renovarase o pintado de portas e fiestras, e colocaranse 1.205 luminarias LED de alta eficiencia.
O proxecto tamén inclúe a reforma da instalación eléctrica, coa incorporación de paneis fotovoltaicos para xeración de enerxía renovable e puntos de carga para vehículos eléctricos.
A rehabilitación do CEIP Pedro Barrié de la Maza forma parte dun investimento sen precedentes nos centros educativos galegos, cun orzamento global de 500 millóns de euros ata 2028. A Xunta reafirma así o seu compromiso cun modelo de ensino máis accesible, sostible e acorde ás demandas do século XXI.