Inaugurado en Irixoa o obradoiro de emprego Forestal Lambre-Mandeo 2024
A delegada da Xunta, Belén do Campo, inaugurou o obradoiro de emprego dual Forestal Lambre-Mandeo 2024, que formará 20 persoas en actividades auxiliares de conservación e mellora de montes. Este programa, impulsado pola Xunta de Galicia cun investimento de case 412.000 euros, terá unha duración de nove meses e desenvolverá actuacións en catro concellos: Irixoa, Vilarmaior, Aranga e Monfero.
En Irixoa, os traballos centraranse na mellora de catro rutas forestais e nas áreas recreativas da Viña, A Graña e o Pazo de Irixoa. En Aranga, realizarase a conservación de espazos como o Mirador do Vieiro e a área fluvial Ponte. Pola súa parte, Monfero abordará actuacións no entorno do Monasterio de Monfero, mentres que en Vilarmaior mellorarase a área fluvial do Muiño das Ferreñas e outras seis áreas recreativas e sociais.
A representante autonómica destacou que este programa combina formación teórica e traballo remunerado de interese público, permitindo ao alumnado obter un certificado de profesionalidade e mellorar as súas opcións de inserción laboral. A Xunta prioriza a participación de colectivos con maiores dificultades de acceso ao emprego, como mulleres, maiores de 45 anos ou persoas desempregadas de longa duración.
Belén do Campo subliñou o compromiso do Goberno galego cos obradoiros de emprego, que na convocatoria 2024-2025 suporán un investimento de máis de 36 millóns de euros en Galicia para beneficiar a 1.700 persoas desempregadas.