Inaugurada en Palexco a exposición 'Galicia, unha escola' polo 50 aniversario da ETSAC
A sala de exposicións de Palexco acolle desde hoxe e ata o vindeiro 11 de xaneiro a mostra 'Galicia, unha escola', unha homenaxe a todo o profesorado e alumnado que, desde 1975, formou parte da Escola Técnica Superior de Arquitectura da Universidade da Coruña (ETSAC).
O acto inaugural estivo presidido polo reitor da UDC, Ricardo Cao, acompañado polo director da ETSAC, Miguel Abelleira; o conselleiro de Educación, Ciencia, Universidades e Formación Profesional, Román Rodríguez; o concelleiro de Urbanismo, Rehabilitación e Vivenda da Coruña, Francisco Dinís, antigo estudante do centro; e o delegado do Goberno en Galicia, Pedro Blanco.
A exposición, comisariada polos arquitectos Felipe Peña e Luis Gil e pola arquitecta Mercedes González, reúne obras dun cento de profesionais que, directa ou indirectamente, deixaron pegada na traxectoria da escola. A proposta recupera traballos e nomes de persoas vinculadas ao ensino da arquitectura entre 1975 e 2025, destacadas en ámbitos moi diversos.
No seu discurso, o reitor destacou o carácter social da ETSAC. 'Unha escola que se converteu nun referente académico e social, abrindo camiños a máis de 5000 profesionais que, co seu talento e paixón, contribuíron a mellorar Galicia', sinalou Cao. Tamén subliñou que o 50 aniversario representa 'o recoñecemento ao valor, á formación, á diversidade e á paixón polo saber, renovando o compromiso de seguir construíndo futuro desde a inclusión e o respecto'.
Os comisarios da mostra explicaron que 'Galicia, unha escola' reúne deseño, fotografía, urbanismo, crítica e novos medios, amosando que a formación en Arquitectura funciona como un eixo dinámico capaz de mellorar a sociedade desde múltiples perspectivas.
Pola súa banda, Miguel Abelleira salientou que a exposición pretende 'poñer en valor a multidisciplinariedade que xorde na escola e que permite que arquitectos e arquitectas contribúan á mellora de Galicia desde numerosos campos profesionais'.
Xunto coa mostra, editouse un libro que recompila todas as obras expostas e inclúe achegas persoais de cada autor e autora, reflectindo a variedade de talentos presentes en áreas como a función pública, a fotografía, o urbanismo, a investigación, a industria ou os novos medios.