Cultura

O artista impúxose no certame coa peza ‘Fogar’, unha composición centrada na emoción, o reencontro e a morriña destas datas

O veciño do Concello de Abegondo Hugo Torreiro converteuse no gañador da Canción do Nadal 2025 da Televisión de Galicia cunha proposta cargada de sensibilidade e emoción. A súa peza, titulada ‘Fogar’, foi a escollida como a mellor deste certame musical, un dos máis seguidos das festas do Nadal en Galicia.

Segundo explicou o propio artista, a canción naceu coa intención de achegarse á sinceridade destas datas tan sinaladas e de transmitir sentimentos universais como o reencontro coa familia e a morriña. ‘Quería transmitir o valor real do reencontro e a nosa morriña, algo que lle falase directamente ao corazón da xente’, sinalou Torreiro tras coñecerse o resultado.

O triunfo de Hugo Torreiro supón un importante recoñecemento ao seu traballo artístico e tamén un motivo de orgullo para o municipio de Abegondo, que ve como un dos seus veciños acada relevancia a nivel autonómico grazas á súa música.