Hugo Suárez Blanco e Inés Seoane García serán os representantes das festas patronais de Betanzos
O Concello de Betanzos confirmou os nomes das persoas que representarán as festas patronais deste ano nun sorteo público celebrado coa presenza da alcaldesa, María Barral, e da concelleira de Festas, Ánxeles Veiga.
Hugo Suárez Blanco, que foi o único candidato para o posto, ocupará a posición de representante maior. Mostrouse ‘encantado’ de formar parte dunha tradición que leva no seu corazón desde neno.
Pola súa banda, Inés Seoane García foi escollida como representante infantil tras un sorteo entre dúas solicitudes presentadas. Curiosamente, Inés naceu o mesmo día de San Roque, o 16 de agosto de 2016.
Desde hai varios anos, Betanzos substituíu a figura tradicional da Raiña das festas por un modelo máis inclusivo, no que ‘calquera persoa, sexa cal sexa o seu xénero poderá ser representante das festas patronais’. Esta iniciativa busca abrir a participación e reflectir mellor a diversidade da comunidade.
Unha vez elexidos, Hugo e Inés poderán participar nos desfiles vestindo a roupa e as cores que desexen. Ademais, terán a liberdade de configurar a comitiva dos desfiles dos días 14, 15 e 16 de agosto, sempre que a súa elección se adapte ás características do propio evento.
Así, Betanzos continúa a reforzar a súa tradición festiva, promovendo valores de inclusión e liberdade para que as festas patronais sexan un espazo de convivencia e celebración para todas as persoas.