Homenaxe en Culleredo ao profesor José Manuel Costas polo seu legado na formación marítimo-pesqueira
O subdelegado do Goberno na Coruña, Julio Abalde, asistiu hoxe na Universidade Laboral de Culleredo a un acto de homenaxe ao profesor José Manuel Costas Capelo, promovido pola Asociación Española de Titulados Náutico-Pesqueiros (AETINAPE). O recoñecemento puxo en valor a súa longa traxectoria ao servizo da formación marítimo-pesqueira galega e o seu compromiso cun sector chave para Galicia.
Durante o evento, subliñouse a súa condición de Socio de Honra da AETINAPE e destacouse o papel esencial que desempeñou na mellora da seguridade marítima e na profesionalización dos profesionais do mar, formando xeracións de titulados náutico-pesqueiros que hoxe traballan en distintos eidos do sector.
Para Julio Abalde, 'o legado de Costas transcende xeracións, porque non só transmitiu coñecementos técnicos e científicos, senón tamén valores de rigor, compromiso e vocación de servizo público, fundamentais para quen navega e traballa no mar'. O subdelegado puxo en valor a contribución do docente á modernización da ensinanza marítima e á consolidación dunha cultura de seguridade nas embarcacións.
A homenaxe converteuse así nun recoñecemento explícito ao esforzo, á constancia e á dedicación dun mestre que entregou a súa vida profesional a preparar futuras promocións de mariñeiros e técnicos do sector marítimo-pesqueiro, deixando unha fonda pegada tanto no ámbito académico como na comunidade marítima galega.