Helsinki e Cambre estreitan lazos co novo programa Erasmus+
Helsinki e Cambre están máis unidas que nunca a través dun novo programa de intercambio lingüístico enmarcado no Erasmus+. A iniciativa conta coa participación do IES David Buján e o seu homólogo finlandés, Taivallahden Peruskoulu.
A alcaldesa de Cambre, María Pan, recibiu esta semana aos estudantes cambreses e finlandeses que están a participar neste intercambio. Durante a recepción, a rexedora deu a benvida aos mozos e mozas e animounos a seguir participando en actividades como esta “coas que continuades aprendendo tamén fóra das aulas”.
Durante a súa intervención, a alcaldesa realizou unha breve presentación na que explicou algúns dos principais atractivos de Cambre, como a igrexa románica de Santa María de Cambre, o paseo fluvial ou o paso polo concello do Camiño Inglés. Tamén mencionou eventos importantes da vila como o Entroido, a Galaicoi, a feira Open Science ou o festival Rock in Cambre.
Este intercambio comezou en febreiro cando foron os estudantes de Cambre os que se desprazaron a Helsinki. Agora, os estudantes finlandeses fixeron o propio, participando durante toda a semana nun variado programa de actividades. Entre elas, destacaron as clases no IES David Buján, onde continuaron perfeccionando o seu nivel de español, ademais de visitas á igrexa de Santa María de Cambre, ao Museo do Xacemento e aos museos e á Torre de Hércules de A Coruña. O programa tamén incluíu actividades máis lúdicas, como unha clase de surf, un taller de elaboración de pan e a realización dun tramo do Camiño de Santiago.
Este intercambio cultural e educativo segue fortalecendo os lazos entre Cambre e Helsinki, promovendo o coñecemento mutuo e a aprendizaxe compartida entre os mozos e mozas de ambas as localidades.