Gran desfile con 27 comparsas e máis de 1.150 persoas para vivir o Antroido 2025 da Coruña
O Concello da Coruña organiza un ano máis a cita consolidada do seu Antroido 2025, o concurso de comparsas nas modalidades de vestiario, coreografía, orixinalidade e carrozas. O evento reunirá 27 comparsas e máis de 1.150 persoas que desfilarán polas rúas coruñesas nunha tarde chea de cor e espectáculo.
O evento, incluído dentro da ampla programación do Goberno de Inés Rey para potenciar o Antroido local, terá lugar o sábado 1 de marzo a partir das 18.00 horas. O percorrido iniciarase no porto de Calvo Sotelo (Praza de Ourense) e continuará por Sánchez Bregua, Praza de Mina, Cantón Pequeno, Cantón Grande, Avenida da Mariña, Avenida Montoto, Porta Real e finalizará na Praza de María Pita.
Con motivo do desfile, habilitaranse cortes de tráfico e desvíos en diferentes puntos da cidade, incluíndo accesos como a AC-11 (Avda. Alfonso Molina), a Avda. do Exército e a Avda. de Linares Rivas. O transporte público urbano e interurbano sufrirá modificacións, polo que se recomenda planificar os desprazamentos con antelación.
Para garantir unha experiencia segura e cómoda para toda a cidadanía, o Concello da Coruña suxire evitar o uso do vehículo particular durante o evento debido aos cortes de tráfico previstos. Recoméndase empregar o transporte público, que terá paradas provisionais na Estación de Autobuses. Ademais, é importante seguir as indicacións do persoal de seguridade e respectar as zonas habilitadas para o público. Para garantir unha boa visibilidade e evitar aglomeracións, aconséllase acudir con tempo e situarse con antelación ao longo do percorrido.
O desfile de carrozas do Antroido 2025 pon en valor a tradición e creatividade das agrupacións coruñesas, que conforman a maior parte da participación. Contará con diversas propostas que combinan elementos tradicionais con innovación escénica.
Ademais, o desfile incluirá a participación de comparsas doutros concellos, mantendo unha aposta por un Antroido integrador e aberto. As temáticas abarcan dende referências mitolóxicas ata representacións de elementos culturais propios da nosa historia, con carrozas de gran envergadura que ofrecerán un espectáculo visual e musical para toda a veciñanza e visitantes.