Gloria Rico porá a súa ollada na gran festa dos XXX María Casares
A trixésima edición dos Premios de Teatro María Casares xa ten directora. A Asociación de Actores e Actrices de Galicia anunciou este martes que Gloria Rico será a encargada de conducir artisticamente a gala que se celebrará o mércores 8 de abril no Teatro Rosalía Castro da Coruña, unha cita chamada a converterse nun dos grandes encontros do sector escénico galego neste 2026.
A edición deste ano xirará arredor da memoria de Manuel Lourenzo, falecido o 10 de agosto de 2025 e considerado unha das figuras imprescindibles para entender a historia recente do teatro galego. A proposta escénica de Rico afástase do ton solemne para apostar por unha celebración da súa traxectoria, das súas loitas e da súa pegada cultural, cun formato pensado como unha festa popular en directo, con espazo para a música, o baile e a reflexión arredor do seu legado.
A elección de Gloria Rico encaixa co perfil dunha profesional de longo percorrido sobre os escenarios galegos. Licenciada en Filoloxía Hispánica pola Universidade de Santiago de Compostela e codirectora de Teatro En Punto, participou en montaxes de compañías como Matarile e desenvolveu unha carreira vencellada tanto á interpretación como á dirección e á produción. A súa traxectoria inclúe tamén colaboracións co Centro Dramático Galego e traballos recentes como actriz en 'Invocación'.
A gala será ademais o escenario no que se entreguen 16 galardóns entre 17 espectáculos finalistas, nunha edición especialmente simbólica por cumprir trinta anos. Todos os detalles do evento presentaranse o luns 6 de abril ás 12.30 horas no propio Teatro Rosalía Castro, nun acto no que participarán representantes da AAAG e das administracións e entidades colaboradoras que respaldan a cita.