Gala i Ovidio actuará o 28 de agosto nas Festas de María Pita
A cidade da Coruña acollerá o xoves 28 de agosto o primeiro concerto de Gala i Ovidio, o novo proxecto musical que une a Aida Tarrío, integrante do recoñecido grupo Tanxugueiras, e a Raül Refree, prestixioso músico e produtor.
A actuación servirá para inaugurar a programación da tradicional Romaría de Santa Margarida, que se celebra dentro das Festas de María Pita e pecha o calendario festivo da cidade herculina.
O concelleiro de Cultura e Turismo, Gonzalo Castro, destacou que “desde o Goberno de Inés Rey apostamos por traer á cidade grandes figuras de todos os estilos musicais durante as festas de agosto, aumentando a calidade de eventos tan recoñecidos como a Romaría de Santa Margarida”.
O proxecto Gala i Ovidio rende homenaxe no seu nome aos fillos xemelgos da escritora Rosalía de Castro, nacidos en 1871 en Lestrove. Aida Tarrío e Raül Refree atopáronse no ano 2021 no Pazo de Mariñán, onde comezou un proceso creativo que se estendeu durante catro anos, entre procuras e gravacións, para dar forma a esta proposta musical gardada en segredo ata o momento.
Ambos artistas comezaron interpretando cancións tradicionais galegas e, inspirados por elas, foron explorando novos territorios sonoros nos que a tradición se intúe e os xéneros se dilúen. Raül Refree asegura que na voz de Aida resoan as mulleres galegas das últimas décadas, un arraigamento que lles permite experimentar sen perder a identidade.
A Romaría de Santa Margarida celebrarase entre o xoves 28 e o domingo 31 de agosto, convertendo o parque de Santa Margarida no epicentro da música e o baile tradicional coruñés.