ForGA impulsa en Oleiros catro cursos gratuítos con prácticas para mellorar a inserción laboral de 60 persoas desempregadas
A Fundación para a Orientación Profesional de Galiza (forGA) vén de abrir en Oleiros o prazo para anotarse en catro cursos gratuítos dirixidos a persoas en paro, cun total de 60 prazas (15 por cada formación). O obxectivo é facilitar unha incorporación rápida ao mercado laboral a través de especialidades con certificación oficial e prácticas en empresas, ademais de contidos en prevención de riscos laborais.
As accións formativas abranguen a cualificación en soldadura por arco baixo gas protector con electrodo consumible (soldeo MIG/MAG), a atención sociosanitaria a persoas dependentes en institucións sociais, as operacións auxiliares de servizos administrativos e xerais e a habilitación para a docencia nos graos A, B e C do sistema de Formación Profesional. As edicións previstas en Oleiros arrancarán entre marzo e setembro de 2026, en función do itinerario escollido.
O único requisito para participar é estar inscrito como demandante de emprego. A inscrición debe formalizarse a través da web da entidade e, ao seren prazas limitadas, a fundación lembra a conveniencia de tramitar a solicitude canto antes.
ForGA, creada en 1996, conta cunha rede de centros homologados en Galicia. No caso de Oleiros, a sede está situada na avenida Rosalía de Castro, en Perillo, e dispón tamén de servizo de orientación laboral. Estes cursos realízanse con financiamento da Xunta de Galicia e do Ministerio de Educación.