Expertas da universidade e da empresa analizan no CIE Mans o impacto da intelixencia artificial
O Centro de Iniciativas Empresariais Mans (CIE Mans), da Fundación Paideia Galiza, acollerá o vindeiro 1 de decembro, ás 12.30 horas, a xornada ‘Intelixencia con conciencia’, un espazo de reflexión destinado a analizar como a intelixencia artificial está a transformar a tecnoloxía, a empresa e a vida cotiá das persoas, así como os riscos e oportunidades asociados ao seu uso.
A iniciativa, de carácter gratuíto e aberta ata completar aforo, ten como obxectivo ofrecer unha mirada crítica e responsable sobre unha tecnoloxía que xa impacta en ámbitos como a saúde, a comunicación, o emprego ou a educación. As inscricións realízanse a través da web de Mans.
A sesión contará coa participación de catro expertas vencelladas á universidade e ao sector tecnológico. Intervirán Laura M. Castro Souto, profesora titular do Departamento de Ciencias da Computación e Tecnoloxías da Información da UDC, investigadora no grupo Cidadanía Dixital (DIGI) e directora do Centro de Estudos de Xénero e Feministas (CEXEF); Noelia Barreira Rodríguez, profesora titular e investigadora do grupo VARPA da UDC, especializada en visión por computador aplicada á imaxe médica; e Paloma Piot Pérez-Abadín, doutoranda no Laboratorio de Recuperación da Información (IRLab) da UDC, centrada na detección de discurso de odio en redes sociais mediante IA.
Completará o panel Gema Ruiz Díaz-Mariblanca, Innovation, Data & AI Manager en Softtek EMEA, enxeñeira de Telecomunicacións pola Universidade Politécnica de Madrid e enxeñeira Informática pola UNED, cunha traxectoria de case dúas décadas en proxectos de Big Data, intelixencia artificial, aprendizaxe automática, Data Science, IoT, blockchain, ciberseguridade e, máis recentemente, intelixencia artificial xerativa.
‘Intelixencia con conciencia’ pretende abrir un diálogo accesible tanto para persoas profesionais como para público xeral, abordando cuestións como a ética dos algoritmos, o impacto da IA no emprego, a xestión de datos persoais, a loita contra o discurso de odio ou os límites e potencialidades da IA xerativa.
A Fundación Paideia Galiza, impulsora da xornada, leva dende 1986 traballando para promover cambios sociais que favorezan a igualdade de oportunidades, creando espazos de formación e reflexión e xerando condicións para o desenvolvemento integral das persoas e dos territorios. O CIE Mans, que a fundación xestiona no Polígono de Pocomaco (A Coruña) e cunha sede tamén en Padrón, é un espazo de referencia para o emprendemento en Galicia, pensado para impulsar ideas, consolidar negocios e fortalecer proxectos colaborativos.