Éxito rotundo no III Torneo Solidario de Fútbol Sala en Culleredo
O III Torneo Solidario de Fútbol Sala, organizado polo Partido Popular de Culleredo en beneficio de Cáritas Vilaboa, pechouse cun gran éxito. Durante a xornada, celebrada o sábado 4 de xaneiro, recadáronse máis de 300 quilos de alimentos non perecedoiros e produtos de aseo persoal, que Cáritas distribuirá entre as familias máis necesitadas.
A portavoz popular, Izaskun García, destacou “a gran asistencia de público durante todo o día, o que permitiu superar a recadación de anos anteriores”. Ademais, subliñou a achega económica dos patrocinadores, que reforza o carácter solidario do evento.
O torneo contou coa participación de seis equipos da categoría prebenxamín procedentes de Culleredo, A Coruña, Cambre e Betanzos. O campión foi o Troula A de Betanzos, que venceu nunha emocionante final ao Sporting Cambre. O terceiro e cuarto postos foron para o Olímpico de Rutis e o Troula B, respectivamente, completando o cadro o Sporting Burgo e o Hércules FS.
Carlos Leites, edil popular, destacou o nivel competitivo dos pequenos deportistas: “Noraboa aos campións, finalistas e a todos os participantes que fixeron deste torneo un día inesquecible. É un orgullo ver o talento e o esforzo destas pequenas promesas do fútbol sala”.
O éxito desta edición anima ao PP de Culleredo a comezar a preparar a cuarta edición do torneo. “Este evento combina dous valores fundamentais: o deporte e a solidariedade. A súa boa acollida entre os veciños é emocionante”, afirmou García. A portavoz tamén agradeceu “a colaboración dos clubs participantes, das familias e de Cáritas Vilaboa, ademais do apoio dos patrocinadores que fixeron posible este gran evento”.