Estudantes coruñeses de 1º de Bacharelato parten a Irlanda co programa Idiomas do Mundo
O programa municipal Idiomas do Mundo 2025 arrancou coa despedida do grupo de 32 estudantes de 1º de Bacharelato que participarán nunha estadía de catro semanas en Irlanda. O acto tivo lugar no Monte de San Pedro e contou coa presenza do concelleiro de Educación, Formación e Innovación Tecnolóxica, Juan Ignacio Borrego.
O alumnado seleccionado viaxará á cidade de Kilkenny, onde convivirá con familias anfitrioas e asistirá a clases centradas na práctica oral do inglés. A experiencia complétase con actividades culturais, deportivas e excursións a distintos puntos do país.
Borrego animou aos participantes a “aproveitar esta oportunidade tanto para o perfeccionamento do idioma como para crecer en experiencias vitais nun contexto internacional”.
O Concello da Coruña financia integramente a iniciativa, cun orzamento próximo aos 150.000 euros. A achega municipal cobre entre o 100 % e o 65 % do custo total da praza segundo os ingresos familiares, o que garante o acceso en condicións de equidade. O programa inclúe todos os gastos: desprazamento, formación, aloxamento, actividades, monitores e seguro.
Para poder optar, o alumnado debía estar matriculado nun centro educativo da cidade no curso 2024-2025, ter unha media mínima de 6 en 4º da ESO, superar todas as materias e acadar polo menos un 7 en inglés.
Idiomas do Mundo busca fomentar o dominio do inglés, a apertura intercultural e a igualdade de oportunidades no acceso á formación internacional. Ao rematar a estadía, os estudantes recibirán un certificado oficial segundo o Marco Común Europeo de Referencia para as Linguas (MCERL).
Esta proposta forma parte da aposta do Goberno local pola educación internacional como vía para ampliar as oportunidades da mocidade coruñesa.