En suspenso a folga indefinida do autobús na Coruña tras un preacordo entre patronal e sindicatos
A folga indefinida no transporte de viaxeiros por estrada na provincia da Coruña, que ía comezar este martes 3 de febreiro, queda polo de agora aprazada tras un preacordo acadado entre a patronal e os sindicatos. O pacto, pechado no marco dunha mediación no Consello Galego de Relacións Laborais, terá que ser ratificado pola plantilla en asemblea antes de converterse nun acordo definitivo.
Segundo a información trasladada polas organizacións que secundan o preacordo, o documento recolle parte das reivindicacións que estaban enriba da mesa: recoñecemento da xornada continuada, subas salariais e melloras ligadas a festivos e días de asuntos propios.
No apartado económico, o texto inclúe unha subida do 3,4% para 2025 e outro 3,4% para 2026 (revisable ao IPC, con efecto nas nóminas de 2027), ademais dun plus de absentismo de 1.000 euros brutos anuais condicionado a que a taxa non supere o 6%. Tamén se incorporan complementos por traballar en festivos (35 euros) e unha contía superior (65 euros) para o 24, 25 e 31 de decembro e o 1 de xaneiro.
En canto á organización do tempo de traballo, a proposta sitúa a xornada anual en 1.800 horas e contempla, entre outras medidas, un día máis de asuntos propios, a comunicación con 12 días de antelación dos días de traballo e descanso e cambios vinculados á desconexión dixital. Para os servizos discrecionais que superen as 12 horas, prevese un plus equivalente ao 60% do salario base diario, e tamén se recollen 17 días de permiso por lactación e unha regulación específica para o persoal de acompañamento.
O preacordo non conta, porén, co respaldo da CIG, que considera insuficientes as melloras e critica que non se aborden cuestións como a nocturnidade, a ampliación de permisos, a mellora das coberturas por incapacidade temporal ou avances en conciliación e xubilación parcial. Tamén cuestiona o esquema do plus de absentismo e posibles cambios horarios que, ao seu xuízo, poden ter efectos regresivos.
Pola súa banda, UGT defendeu que o ‘paquete global’ é positivo e lembrou que, para pechar a sinatura definitiva do convenio, reclama o arquivo de sancións abertas durante o conflito por exercer o dereito de folga.
O conflito laboral vén de atrás e xa deixou xornadas de paros parciais en semanas previas. As mobilizacións afectan un sector con milleiros de empregados e impacto directo en liñas interurbanas, comarcais e servizos asociados como o transporte escolar.