Elas Son 2025 ofrecerá máis de 20 actividades culturais en sete concellos da área da Coruña
Máis de vinte propostas artísticas protagonizadas por mulleres chegarán este ano a sete concellos da área metropolitana da Coruña da man da oitava edición de Elas Son Artistas. Baixo o lema “As pequenas comunidades e as artes como refuxio ante a barbarie”, o ciclo arranca o 10 de maio e desenvolverase ata o 29 de novembro con música, poesía, teatro, ilustración e reflexión, coa arte como ferramenta de conexión fronte á violencia e o individualismo.
O ciclo foi presentado no Teatro Colón polo concelleiro de Cultura e Turismo da Coruña, Gonzalo Castro, quen sinalou: “Desde o Goberno de Inés Rey continuamos a impulsar proxectos culturais liderados por mulleres como Elas Son Artistas, que ademais de traer propostas moi interesantes tamén fan reflexionar á cidadanía”.
A Coruña será o concello con máis actividades, nunha edición que contará tamén coa implicación de Arteixo, Betanzos, Carral, Culleredo, Oleiros e Sada.
Propostas destacadas e datas clave
A programación arranca o sábado 10 de maio cun concerto de Las Nietas del Charli en Oleiros (Auditorio A Fábrica, 20:30 h, 4 euros). Continuará o 6 de xuño con Leria en Arteixo (Auditorio exterior Paseo Fluvial).
En xullo, haberá un obradoiro de creación poética con Lucía Aldao os días 15 e 16 na Casa Museo Casares Quiroga (inscrición gratuíta), e o 16 de xullo terá lugar na Praza de Azcárraga o concerto da murciana María Ruíz, acompañada da artista plástica Mamen Bazarra.
O 30 de xullo, Kate Clover actuará por única vez en Galicia na Sala Mardi Gras, e durante todo agosto poderá visitarse a exposición de Julia Lago na Casa Museo María Pita.
En setembro, destacan tres artistas internacionais: o 11 de setembro, Jacque Falcheti (Brasil) en Mardi Gras; o 14 de setembro, Hannah Aldridge (Alabama) co seu concerto folk-rock; e o 21 de setembro, Anna Tréa na Fundación Luis Seoane, seguida da proxección do documental Raíces. Da utopía en diante, cun coloquio a cargo da cooperativa galega Illa Bufarda e protagonistas do proxecto.
O 24 de setembro, o Jazz Filloa acollerá unha actuación aínda por confirmar.
En outubro, o ciclo comeza o día 3 co concerto das asturianas Pauline en la Playa no Garufa Club. No Instituto de Carral ofrecerase un obradoiro de ilustración e creación de personaxes con Irene Sanjuán e unha actuación de Adhara & Ritman para o alumnado do centro.
Tamén en outubro, as instalacións de Coca-Cola en Alfonso Molina acollerán un coloquio con Ángela Vila, Candela Liste e María Nieto sobre o papel das mulleres na industria musical galega (data por confirmar).
O 26 de outubro, o Teatro Colón acollerá unha das actuacións estrela do ciclo, aínda por desvelar.
En novembro, o ciclo pecharase con tres propostas:
– O 7 de novembro, Raquel Crespo presentará Punto en boca en Culleredo, espectáculo co que gañou o Premio Luisa Villalta 2024.
– O 8 de novembro, Leticia Rey presentará o seu primeiro disco en galego, Danza Luz, na Casa da Cultura Pintor Lloréns de Sada, acompañada pola bailarina Estefi Gómez.
– O 29 de novembro, Iria Pinheiro porá o broche final no auditorio da Aula de Cultura Xulio Cuns de Betanzos con Vitória, unha peza sobre vivencias persoais que afonda na violencia obstétrica.