EDP e Begasa impulsan a dixitalización da rede eléctrica con drons e intelixencia artificial
Os drons levan anos sobrevoando as redes eléctricas, supoñendo un avance clave na calidade do subministro. Estes pequenos aparellos substituíron os custosos voos en helicóptero e as revisións manuais, con camiñadas de quilómetros. Agora, EDP vai un paso máis alá e incorpora a intelixencia artificial (IA) nas inspeccións.
Cada ano, un dron pode enviar máis de 2.700.000 imaxes ás áreas de mantemento da rede, convertendo a súa revisión nunha tarefa titánica. Para reducir o tempo de visualización e mellorar o servizo, EDP implantou un sistema de IA capaz de revisar esas imaxes e detectar calquera anomalía, como a caída dunha póla sobre a liña, a rotura dun cable, corrosión nunha estrutura metálica ou vexetación que interfira co tendido.
Para acadar este obxectivo, EDP colabora coa empresa castelán-leonesa ATLAS Innovative Engineering, empregando un dron multicóptero que xera un xemelgo dixital das redes eléctricas. Este dron pode levar até cinco sensores ao mesmo tempo, como escáneres láser LiDAR, cámaras RGB de alta resolución e cámaras termográficas.
As situacións que poden xurdir ao longo da rede son múltiples e, en moitos casos, poden xerar incidencias. Hoxe en día, nunha mañá, os drons poden sobrevoar a rede, a IA revisa as imaxes, detecta a anomalía e avisa. Só queda actuar para solucionala.
Burgos foi a localidade escollida por EDP para poñer en marcha este proxecto pioneiro de dixitalización na rede eléctrica. Nas próximas semanas inspeccionarase un total de 253 quilómetros de rede nesta provincia mediante o novo sistema que combina drons, IA e aprendizaxe automática (machine learning), convertendo Burgos nun referente tecnolóxico para o mantemento de infraestruturas eléctricas seguras, eficientes e sostibles.
Ademais de Burgos, EDP despregará este sistema en máis de 15.000 dos 56.000 quilómetros de rede que xestiona en España a través das súas distribuidoras: Viesgo, E-Redes e Begasa.
Para o desenvolvemento do proxecto, EDP contou coa colaboración de dúas empresas: ATLAS, encargada dos drons e a inspección aérea, e Capgemini, coa que desenvolveu algoritmos de IA que permiten analizar as imaxes en menos de 48 horas, identificando defectos cunha precisión do 90 % e co seu punto xeográfico exacto, mellorando así a trazabilidade e o mantemento. É a primeira vez que se acada este fito.
EDP tamén está a explorar o uso de drons autónomos equipados con IA, que realizarán inspeccións en tempo real e comunicarán as anomalías directamente ao centro de control. Este enfoque incrementa a eficiencia operativa e sitúa a empresa como líder na transformación dixital do sector.
Gabriela Vázquez de la Sierra, directora de Xestión Estratéxica de Activos de Explotación de Rede de EDP, sinala que “a combinación de drons e intelixencia artificial está a revolucionar o mantemento das redes eléctricas. Os drons captan imaxes con gran detalle e a IA analízaas. Isto permítenos realizar inspeccións máis rápidas, seguras e precisas, mellorando a calidade e a seguridade do subministro”.
Pola súa parte, Genoveva Rasilla Sandoval, responsable de Optimización de Procesos de IA de EDP, engade que “a IA transformou a nosa capacidade de supervisión. Non só reducimos os tempos de análise, senón que agora contamos cun sistema máis preciso, eficiente e seguro. Este é o futuro da xestión das infraestruturas eléctricas”.
Diego Cuasante, director xeral de ATLAS, destaca que “a incorporación progresiva de drons con sensores de alta precisión á dixitalización das redes eléctricas, clave na transición enerxética, supón unha evolución natural do noso traballo como socio estratéxico de EDP durante máis dunha década, contribuíndo a un acceso á enerxía máis eficiente, sostible, dixital e descarbonizado”.
Alberto Avecilla, Senior Manager en Capgemini Engineering, subliña: “En Capgemini estamos orgullosos de colaborar con EDP na implementación dun sistema de inspección baseado en IA que acelera e mellora a eficiencia, precisión e flexibilidade na supervisión da súa rede eléctrica”.
Impacto humano
A incorporación de drons autónomos e IA non só mellora a eficiencia e seguridade do sistema, senón que tamén impulsa a creación de emprego cualificado en áreas como análise de datos, mantemento avanzado e formación técnica especializada.
As inspeccións con drons reducen o uso de helicópteros e vehículos, minimizando así as emisións de CO₂ e contribuíndo á loita contra o cambio climático.
O uso de drons mellora substancialmente a seguridade ao evitar que as persoas deban achegarse a zonas perigosas do tendido eléctrico, permitindo inspeccións precisas desde distancias seguras.
EDP Redes en España
EDP opera máis de 53.000 quilómetros de redes eléctricas no Estado a través de E-Redes, Viesgo e Begasa. No seu Plan Estratéxico 2023-2026, prevé investir 4.000 millóns de euros no mantemento e modernización da rede.
EDP é un grupo enerxético global líder en valor, innovación e sostibilidade. Forma parte dos índices Dow Jones de sostibilidade (mundial e europeo) e lidera a xeración de enerxía renovable a nivel mundial.
Conta co seu principal negocio en España e Portugal, con máis de 9 GW de capacidade instalada, 288.000 km de redes eléctricas, 60 TWh de enerxía distribuída e 30 TWh comercializados, sendo tamén líder en mobilidade eléctrica.
Emprega máis de 2.000 persoas no país, onde está presente en xeración (4.600 MW), distribución (53.000 km e 1,4 millóns de puntos de subministro) e comercialización de luz, gas e servizos, cunha carteira que supera os 11 TWh e 300 MWp en autoconsumo, así como máis de 1.000 puntos de recarga para vehículos eléctricos.
ATLAS ofrece servizos innovadores de dixitalización e mantemento de infraestruturas eléctricas con tecnoloxía aérea e sensores. A través de xemelgos dixitais e a dixitalización de activos, permite reducir riscos financeiros e non financeiros (ESG). Forma parte do Grupo VOLTAN, con máis de 1.000 traballadores dedicados á infraestrutura enerxética en toda a cadea de valor.