Eventos

Miño ofrecerá este mes a proxección do documental ‘Chicas Nuevas 24H’, acompañada dunha exposición, e unha saída de rafting no río Miño dirixida á mocidade

O programa Xuventude en CaMiño reforza a súa axenda de abril con dúas actividades de perfil moi distinto, pero pensadas para ampliar as propostas de lecer e sensibilización entre a mocidade. A programación inclúe unha iniciativa cultural centrada na denuncia da explotación de mulleres e nenas e, por outra banda, unha saída deportiva no río Miño.

A primeira das citas xirará arredor do documental ‘Chicas Nuevas 24H’, dirixido por Mabel Lozano. A actividade, de balde, aborda a problemática do tráfico e da explotación de mulleres e nenas a nivel internacional, ofrecendo unha visión crítica sobre esta realidade. Ademais da sesión principal, haberá unha proxección aberta ao público en xeral o 17 de abril ás 19.00 horas no local social da Rúa.

Como complemento a esta proposta audiovisual, o programa inclúe tamén unha exposición vinculada á obra, que poderá visitarse entre o 1 e o 15 de abril. Con esta actividade, a programación busca combinar cultura e concienciación social nun formato accesible para a veciñanza.

A segunda proposta do mes terá un carácter máis dinámico. O 25 de abril celebrarase unha saída de rafting no río Miño, dirixida a mozas e mozos nados entre os anos 2008 e 2013. Neste caso, a participación terá un custo de 8 euros.

As persoas interesadas en participar poderán formalizar a súa inscrición no Rexistro do Concello. Para obter máis información, tamén está dispoñible o teléfono 604 004 439 e o correo electrónico cultura.deportes@concellodemino.gal.