Dous estudantes da UDC, premiados a nivel estatal pola súa reflexión sobre as adiccións
A Universidade da Coruña vén de celebrar o éxito de dous dos seus estudantes no concurso nacional “Adicciones: tu punto de mira”, unha iniciativa do programa TU PUNTO que busca fomentar a reflexión crítica da mocidade universitaria sobre as condutas aditivas. Nesta edición, o certame reuniu un total de 340 obras procedentes de 61 universidades de todo o Estado, entre vídeos de YouTube, carteis para Instagram e vídeos de TikTok.
Lucía Vázquez Amor, estudante do Grao en Educación Primaria, obtivo o primeiro premio na categoría de vídeos para YouTube. Pola súa banda, Diego Otero Saavedra, alumno de Comunicación Audiovisual, conseguiu o segundo galardón na mesma categoría. Ambos foron recoñecidos pola orixinalidade e compromiso social dos seus traballos, que poñen o foco nos riscos das adiccións desde unha perspectiva innovadora e sensibilizadora.
O programa TU PUNTO está financiado pola Delegación do Goberno para o Plan Nacional sobre Drogas e conta co apoio da Red Española de Universidades Promotoras de Salud (REUPS). A súa misión céntrase en facilitar información sobre os riscos do consumo de drogas e das adiccións comportamentais, ao tempo que promove estratexias de autocontrol e procesos de reflexión entre o estudantado.
As obras de Lucía Vázquez e Diego Otero son unha mostra do papel transformador que pode desempeñar o alumnado universitario na promoción da saúde e o benestar social a través da creatividade e a comunicación. Un exemplo de compromiso que pon en valor o talento da mocidade da UDC ao servizo da concienciación social.