Docentes péchanse no CEIP Concepción Arenal da Coruña para reclamar melloras no ensino público
Un grupo de docentes iniciou un peche reivindicativo no CEIP Concepción Arenal co obxectivo de reclamar melloras no ensino público e nas condicións de traballo do profesorado. A acción, promovida pola CIG-Ensino e o STEG, inclúe tamén a presenza de familias e alumnado e prevé manterse durante a noite para realizar mañá un acto informativo coincidindo coa entrada ao centro e o inicio das clases.
As protestas do profesorado comezaron xa no primeiro trimestre do curso, con mobilizacións que levaron á convocatoria de 5 días de folga, marchas fúnebres, manifestacións e o enterro simbólico do ensino público, así como seis peches en varios centros, que contaron cun gran respaldo por parte do persoal. O propósito é visibilizar as demandas e reclamar a apertura dunha negociación para introducir cambios que, ao seu xuízo, melloren a calidade educativa.
Entre as reivindicacións compartidas por profesorado, familias e alumnado figuran a redución de ratios, a mellora da atención á diversidade coa dotación de máis persoal e medios, o incremento da oferta pública de optativas na ESO e Bacharelato, de ciclos de FP e de ensinanzas de réxime especial, ademais dunha humanización do ensino que reduza a carga burocrática e dun menor horario lectivo para favorecer unha mellor atención no día a día das aulas.
A secretaria comarcal da CIG-Ensino, Laura Arroxo, presente no peche da Coruña, explicou que a intención é sumar a toda a comunidade educativa e poñer o foco nas carencias dos centros: ‘cando falamos de que non hai profesorado de Pedagoxía Terapéutica, Audición e Linguaxe ou persoal orientador suficiente, estamos evidenciando unha gran carencia no sistema’. Arroxo advertiu tamén de que a falta de recursos e de desdobres prexudica especialmente o alumnado máis vulnerábel e dificulta garantir a igualdade de oportunidades.
No marco do peche estanse a desenvolver actividades como asembleas abertas, debates sobre a folla de ruta, elaboración de material reivindicativo e posta en común con representación das familias e do alumnado. As entidades convocantes indican que a medida conta co apoio da Confederación Anpas Galegas e do sindicato estudantil Erguer.
Esta mobilización non se limita á Coruña: ao mesmo tempo iniciáronse peches noutros centros de Vigo, Pontevedra e Monforte, dentro dun calendario máis amplo de accións previstas para as vindeiras dúas semanas, co obxectivo de estender as protestas polo conxunto de Galicia.