Dobre presenza galega no torneo mundial de ximnasia estética de grupo en Samokov
O talento galego da ximnasia estética de grupo terá unha presenza destacada no torneo mundial que se celebra nos vindeiros días en Samokov (Bulgaria). Dous clubs galegos, Ximnasia Oleiros Rítmica e Estética e o Club Ximnasia Pavillón Ourense, integran a delegación española xunto con outros seis equipos do resto do Estado.
O equipo sénior de Ximnasia Oleiros chega á competición nun excelente momento deportivo, logo dunha tempada na que consolidou o seu papel de referencia na modalidade. O conxunto oleirense competirá nas probas internacionais de GEG que se disputarán en Samokov, co obxectivo de trasladar ao tapiz o intenso traballo realizado durante todo o ano.
Pola súa banda, o Pavillón Ourense acudirá co seu conxunto júnior mixto, que tamén vén de asinar resultados destacados a nivel estatal. A clasificación para esta cita supón un importante recoñecemento ao proxecto que a entidade ourensá está a desenvolver arredor da ximnasia estética de grupo.
Desde o ámbito da ximnasia española xa se lles transmitiron mensaxes de apoio e ánimo a todos os equipos que viaxarán a Bulgaria, con especial mención aos dous representantes galegos. Agárdase que poidan asinar unha boa actuación neste torneo mundial e poñer un broche moi doce á tempada.