Dobre prata para Mateo García e gran actuación de Paula Otero no Meeting Internacional de Xenebra
O orgullo deportivo volveu viaxar esta fin de semana ata Suíza da man do Club Natación Arteixo. Os nadadores Paula Otero e Mateo García competiron coa selección española no 59º Meeting Internacional de Xenebra, unha cita celebrada do 23 ao 25 de xaneiro no Centre Sportif des Vernets.
Mateo García asinou unha actuación destacada ao colgarse dúas medallas de prata nas probas de 800 e 1.500 libre. No 800 quedou a só 0,30 segundos do ouro (8:03.84 fronte a 8:03.54) e no 1.500 tamén foi segundo tras un final moi axustado (15:28.71), a menos dun segundo do vencedor (15:27.94).
Pola súa banda, Paula Otero completou un bo papel nas probas de fondo: foi cuarta na final de 1.500 libre (16:40.98), nunha carreira na que España colocou varias nadadoras nos postos de cabeza. O Concello engadiu que Otero rematou tamén sexta no 800 libre.
O club xa afronta a próxima gran parada do calendario: o Campionato de España RFEN de Longa Distancia, que se disputará o sábado 31 de xaneiro de 2026 na Piscina Municipal Esperanza Lag, en Elxe. A Federación Galega de Natación confirmou, ademais, a presenza do arteixán Mateo García entre os clasificados para a proba absoluta de 5.000 metros. O Concello sinala que, xunto a el, tamén competirán Paula Otero e Paula Rodríguez nesa distancia.