Dobre cita coa Grecia clásica da man de El Ruiseñor este fin de semana
A compañía Teatro El Ruiseñor volve subir ao escenario esta fin de semana cunha proposta a dúas bandas que mira de fronte aos grandes clásicos gregos. O auditorio Gustav Mahler do Conservatorio Municipal acollerá o sábado 28, ás 20.30 horas, a representación de 'Edipo rei', de Sófocles, e o domingo 1 de marzo, ás 19.00 horas, a comedia 'La asamblea de las mujeres', de Aristófanes.
As dúas pezas chegan en versión adaptada pola directora da formación, Susana Crespo, e funcionan tamén como antesala do salto ao Festival de Teatro Grecolatino de Lugo, no que El Ruiseñor participará o mércores 4 de marzo no Auditorio Gustavo Freire con 'Edipo rei' ás 12.00 horas e 'La asamblea de las mujeres' ás 17.00 horas.
Na traxedia de Sófocles, Tebas sofre unha praga e o Oráculo de Delfos marca o camiño: para que a peste remita, debe desterrarse o asasino do anterior monarca. A busca de Edipo irá estreitando o cerco ata converterse nunha viaxe cara á súa propia caída. Pola contra, Aristófanes propón unha sátira política na que un grupo de mulleres se disfraza de homes para dominar a asemblea da cidade, desatando unha cadea de situacións cómicas cando tentan contentar a todo o mundo.
As entradas custan 5 euros e poderán mercarse no Xardín Botánico do Burgo hoxe, xoves 26, e mañá, venres 27, de 18.00 a 20.30 horas.
El Ruiseñor, nacida en 2006 e dirixida por Susana Crespo, celebra dúas décadas de traxectoria mantendo un repertorio no que conviven textos clásicos e adaptacións propias, cunha forte presenza do teatro grecolatino.