Doazón de sangue con ADOS na praza exterior de Marineda City o sábado 27
A Axencia de Doazón de Órganos e Sangue de Galicia (ADOS) desprazará a súa unidade móbil este sábado, 27 de setembro, á praza exterior de Marineda City para recoller doazóns de sangue entre as 10.00 e as 15.00. Como detalle de agradecemento, entregarase ás persoas doantes un vale para un almorzo na cafetería Lois.
Segundo os datos manexados en anteriores xornadas, adoitan participar arredor de 30 doantes nunha mañá. Na última convocatoria no centro, o 26 de abril, obtivéronse compoñentes que permitiron dispoñer de glóbulos vermellos para intervencións e transplantes, así como plaquetas para pacientes oncohematolóxicos.
ADOS lembra que dunha única doazón extráense tres compoñentes —hematíes, plaquetas e plasma—, polo que un doante pode beneficiar até tres persoas. Os hospitais galegos precisan a diario entre 400 e 500 doazóns para atender urxencias, cirurxías, transplantes e tratamentos en hospitais de día.