Diego Calvo visita o torneo 'Goliños no Nadal' nos campos renovados de Elviña I
O conselleiro de Presidencia, Xustiza e Deportes, Diego Calvo, asistiu este sábado na Coruña ao torneo 'Goliños no Nadal', unha cita de fútbol base organizada pola Real Federación Galega de Fútbol en colaboración coa Asociación de Fútbol Afeccionado na Coruña e co apoio da Xunta.
A competición, que se desenvolve nos campos do complexo deportivo de Elviña I, xunta a máis de 300 nenos e nenas dunha vintena de equipos das categorías biberón e iniciación.
O evento serviu tamén para poñer en valor as melloras xa executadas no recinto, cun investimento de 650.000 euros nos campos de fútbol. Esa contía forma parte dun plan máis amplo que eleva a 3,4 millóns de euros a reforma integral prevista para modernizar Elviña I e garantir condicións axeitadas para os clubs que adestran no centro.
Os traballos incluíron a colocación de céspede novo, a renovación da iluminación por luminarias LED, a instalación dunha nova cuberta na bancada e melloras puntuais nos accesos, mentres continúan intervencións noutros espazos do complexo.