Cultura

Na súa primeira edición, o evento perfilase como unha das grandes citas do verán para amantes do rock e metal alternativo

O festival Fumega Fest, que se celebrará o 4 e 5 de xullo no histórico Parque do Pasatempo de Betanzos, acaba de presentar o seu cartel para a súa primeira edición. Este evento, que se perfila como unha das grandes citas musicais do verán en Galicia, contará con grandes nomes da escena internacional, con bandas de renome como Monkey3 (Suíza), Psychonaut (Bélxica), Greenleaf (Suecia) e Dvne (Escocia), que serán as cabezas de cartel.

Xunto a eles, tamén estarán presentes outras formacións de gran nivel como Exxasens (Barcelona), Mohama Saz (Madrid), Mano de Piedra (Vigo) e Kalte Sonne (Lugo), creando un cartel ecléctico e variado que abarcará os mellores sons do stoner rock, post-rock, psych, space-rock e post-metal.

O Parque do Pasatempo, declarado Ben de Interese Cultural e un dos parques con máis historia de Europa, acollerá este evento musical que ofrecerá dous días de boa música nun entorno único e incomparable. Fumega Fest busca converter Betanzos nun punto de referencia para os amantes da música e da cultura alternativa, nunha cita que, sen dúbida, marcará o inicio dunha nova tradición no calendario dos festivais galegos.