Destínanse 300.000 euros para proxectos medioambientais na provincia en 2025
A Deputación da Coruña abre o prazo de solicitudes, a partir do luns 16 de decembro, para optar ás subvencións dirixidas a entidades sen ánimo de lucro no ámbito medioambiental. Estas axudas contan cunha dotación total de 300.000 euros e están destinadas a actividades e investimentos ambientais durante o ano 2025.
As entidades interesadas deben estar inscritas no Rexistro de Entidades de Carácter Ambiental de Galicia ou ter como obxectivo a protección e conservación dos recursos naturais, cunha antigüidade mínima de dous anos. O prazo de presentación remata o 16 de xaneiro de 2025, ás 14:00 horas, e a tramitación realizarase exclusivamente de forma telemática a través da plataforma SUBTEL, dispoñible na sede electrónica da Deputación.
A liña para actividades contará cun orzamento de 200.000 euros, con axudas que oscilarán entre 2.000 e 25.000 euros. Pola súa banda, a liña destinada a investimentos disporá de 100.000 euros, cun rango de subvencións de entre 2.000 e 30.000 euros por proxecto.
Segundo a deputada de Medio Ambiente, Rosa Ana García, “as entidades beneficiarias desenvolverán accións relacionadas co voluntariado ambiental, a sensibilización, a loita contra o cambio climático, a limpeza de praias ou a posta en valor dos recursos naturais, fomentando a participación social no compromiso co medio ambiente.”
En 2024, 20 proxectos contaron co apoio destas subvencións, destacando iniciativas como a custodia do territorio da Fundación Fragas do Mandeo, o proxecto “Defende o mar a través do surfing” de Surf and Clean, o festival Mar de Mares ou os programas de conservación de solos de Vento Noso.