Entrevista | Deportes

Para coñecer máis sobre a historia, a evolución e os retos da formación conversamos co seu presidente, Iago Docampo Pérez

Por Amanda Fernández

O quidditch, tamén coñecido como quadball, é un deporte mixto que combina elementos do rugby, balonmán e dodgeball. Aínda que a súa orixe está inspirada na famosa saga de Harry Potter, esta disciplina evolucionou ata converterse nun deporte competitivo con equipos en todo o mundo. Un dos referentes en España, decano do quidditch galego, é o equipo Dementores A Coruña. Para coñecer máis sobre a historia, a evolución e os retos deste equipo, conversamos con Iago Docampo Pérez, presidente do equipo Dementores A Coruña.

Cando e como naceu Dementores A Coruña?

O comezo da idea do equipo prodúcese en novembro de 2013 sendo formado legalmente en xuño de 2014. A idea xurdiu dunha maneira casual, visualizando unha película no cine (“Os Becarios”) onde vimos que existía unha adaptación e pensamos se iso era de verdade así, se o deporte na realidade existía, e buscando información vimos que efectivamente, era de verdade, que en USA xa levaba moitos anos nas universidades e en España estábase a empezar a introducir.  (os primeiros equipos da península fomos Dementores Coruña, Barcelona Eagles e Madrid Lynx mais ou menos ao mesmo tempo).

Así, contactouse coa xente dun foro que estaba a buscar persoas para empezar en A Coruña e alí contactamos e empezamos, buscando xente entre amigos e en diferentes eventos para formar o equipo sendo un equipo de xente bastante nova.

O quidditch aínda é un deporte descoñecido para moita xente. Como o definiría para alguén que nunca viu como se xoga?

O quidditch (ou quadball como agora estache a chamar) poderíase explicar como unha mestura de varios deportes, que ao principio pode parecer confusa pero a medida que vas vendo e todo bastante claro. Trátase dun deporte de 6 contra 6 (nun momento determinado do xogo 7 contra 7) sendo unha mestura de rugby (porque se pode placar), balonmán porque o principal do deporte son pases e tiros coas mans e meter goles a través dos aros que serían as porterías (cada tanto vale 10 puntos) e de dogedball (balón prisioneiro, brilé, balón quemado, para que se entenda) porque unha das posicións dos xogadores encárganse de eliminar aos rivais mediante o golpeo dunha das pelotas de xogo.

Trátase ademais dun deporte mixto, teñen que xogar por normativa xente dos diferentes xéneros (Masculino, Feminino ou Non Binario) onde hai un tope de tres persoas dun mesmo xénero no campo a vez, facendo disto algo bastante único hoxe en día porque poucos deportes a nivel do que sería unha competición adulta fan.

É bastante dinámico e é moi raro ver partidos lentos, porque está feito para penalizar os ataques moi lentos e volver ao teu propio campo, co cal sempre vai a estar pasando algo no campo e de duración por partido pode ser sobre corenta e cinco minutos a tempo real como moito de media. Porque se xoga a reloxo parado, co cal as pausas non computan no tempo do partido.

Como é o día a día nos adestramentos? Que aspectos son clave para mellorar no quidditch?

O día a día nos adestramentos é bastante bo, non se trata de adestramentos moi duros ao tratarse dun deporte que ten moi poucos anos e descoñecido e ao non ser un deporte profesional non son tan duros. O prioritario sobre todo é no aspecto táctico e mellorar no posicionamento, que facer en cada situación, ao ser un deporte cambiante nas normativas hai que ir modificando cousas cada ano.

O máis importante sobre todo e a actitude, se tes unha actitude proactiva de querer mellorar, todo vai a ir só, porque váiseche a ensinar a como placar, como receptar o balón, onde colocarte, que facer nas situacións... Pero para aprender ben fai falta a actitude de querer aprendelo, aquí ninguén comezou sabendo, e somos un deporte relativamente novo en termos de existencia.

 É A Coruña unha cidade óptima para esta práctica?

Considero que si, que e óptima para está practica porque temos moitas zonas verdes onde se ponde adestrar e inclusive poder ir a praia cando fai bo tempo ou non tan malo. De igual forma hai moita xente nova á que lle pode interesar o deporte, curiosean sobre nós, xa nos recoñecen cando estamos adrestrando e algún xa o teñen parado pola rúa algún cativo de ir facer actividades aos colexios. A nivel asociativo si que recibimos un bo trato por parte das diferentes entidades da cidade. O único malo, e isto será a queixa que teñan o 90 % da xente que fai deporte en A Coruña, e a falta de campos, porque practicamente todo é para fútbol e na cidade hai tanto equipo e fútbol base que non teñen campos para todos e é moi limitado.

A nivel galego e estatal, como vedes a evolución do quidditch? Está gañando máis visibilidade?

Prodúcese un paradoxo, estase a gañar máis visibilidade porque agora se están a producir varios torneos internacionais en España, está o EQC D1 e D2 que os últimos anos fanse en Salou, está a Nations Quadball Cup, que se fai en España que e un torneo internacional de selecciones, o Europeo de selecciones e inclusive o Mundial poderían facerse aquí. Tamén nos colexios se xoga agora ao noso deporte, hai medios que se comezan a interesar e se coñece moito máis, pero dende a COVID sufriuse un retroceso moi grande.

Ao pararse tanto tempo o noso deporte, moitos equipos desapareceron, e estase a intentar recuperar o nivel previo, pero está sendo  moi complexo, tanto aquí coma no resto de España, así que si alguén esta interesado en montar equipo ou unirse a algún existente, sempre estarán as portas abertas para tódolos que queiran.

A próxima semana xogades a EQC D1 en Salou, unha das citas máis importantes do ano. Como afrontades este desafío?

Pois como todo torneo o que vamos, afrontámolo con moitas ganas e co máximo respecto, hai un nivel moi alto nos participantes. Tocounos unha fase de grupos na que podemos sufrir bastante. Nos torneos do noso deporte ao final xóganse moitos partidos nun mesmo fin de semana, de media soen ser 8-9 partidos nunha soa fin de semana. Xa o primeiro día xogaremos 5 e neste tipo de torneo o desgaste e moi alto. O obxectivo que nos marcamos e quedar no top 16 do torneo e acercarnos o maior posible ao top 8, vai ser moi duro porque e moi complexo e hai moito nivel.

Cales son os maiores éxitos que destacades como equipo? Hai algún momento especial que lembredes con cariño?

Ser o equipo polo de agora máis laureado a nivel nacional, nas últimas 7 copas de España nas que chegamos á final delas, 2 campionatos e 5 subcampionatos. Oxalá ter algún campionato máis que un par deles se escaparon por detalles, pero iso demostra a constancia e o nivel do equipo co paso dos anos pese a todo o que pode pasar nun torneo.

Creo os momentos máis especiais foi gañar a primeira copa de España, poder dicir ao fin o conseguimos, e o título na EQC D2 (Se a D1 e o equivalente a Champions en fútbol a D2 sería a Europa League), sendo o primeiro título europeo para un equipo español e que ao comezo de todo o víamos moi lonxe. Foi un momento especial para nós e para o resto do deporte español, que ao acabar a final saltaron o resto dos equipos do noso país para celebralo connosco. Persoalmente foi o torneo no que mellor o pasei.

O quidditch ten unha forte vinculación coa diversidade e a inclusión. Que importancia teñen estes valores dentro do equipo?

Eu creo que moi alto, da igual o xénero co que te identifiques, a túa orientación, procedencia... temos e tivemos xente do equipo que formaba parte de diversas asociacións, tense que ter o máximo respecto porque, ao final, o que importa e como sexas como persoa, e aquí e o que se valora e non outra cousa máis aló diso.

Que estereotipos diría que imperan arredor do quidditch? Hai algún que non sexa de todo certo?

Eu creo que o estereotipo que pode ter a xente é pensar que é un deporte de “frikis” no termo despectivo da palabra, con paus xogando e fans acérrimos de Harry Potter, cando non é así. Trátase dun deporte moi dinámico, de contacto, onde hai xente que practica moitos outros deportes en tódolos equipos que hai no mundo. En USA é un deporte universitario e se pode ver en canais deportivos online e non fai falta que che guste a saga de libros ou películas. A meirande parte dos xogadores actualmente o que lles gusta é o deporte e non a saga na que se inspirou. E ao final, quen queda nun deporte e porque lle gusta máis o deporte que a saga.

Para rematar, que lle diriades a alguén que nunca viu un partido de quidditch e está pensando en probar este deporte?

Diríalle que vaia probar o deporte ou que lle expliquen primeiro como vai, porque hai moitos partidos que podes encontrar en Youtube pero igual non se entera de moito porque hai moitas pelotas en xogo, diferentes posicións e diferentes momentos. Acercarse a probar ou simplemente ver un adestramento dalgún equipo porque seguro que hai alguén que lle explica e animarse nas portas abertas. No noso caso, o recomendable e acercarse ao Parque de Eirís os domingos as 11.00 horas, tanto a mirar como se se quere probar, aínda mellor que avisen antes por se xusto ese día non estamos como vai ser a semana que vén por estar no europeo.

E sobre todo e máis importante: probando é como namoras deste deporte, porque moi pouca xente queda descontenta unha vez o proba. Así que, se hai algunha dúbida, e mellor non quedarse con ela e vir probar!