Curtis entra no nivel alto do risco de incendios

O concello pide extremar as precaucións para evitar sinistros e garantir a seguridade da poboación

Segundo os datos facilitados pola Xunta de Galicia, o municipio de Curtis atópase hoxe nun nivel alto de perigo de incendios forestais, conforme ao IRDI (Índice de Risco Diario de Incendios).

Dende as autoridades lembran a importancia de tomar todas as precaucións posibles, especialmente en actividades que poidan provocar chamas, como o uso de artefactos pirotécnicos ou a queima de restos vexetais. Está totalmente desaconsellado realizar fogueiras para limpar terreos ou empregar maquinaria susceptible de xerar faíscas, como rozadoras ou soldadores, agás que sexa estritamente necesario e cumprindo escrupulosamente as normas de seguridade.

Ademais, fan un chamamento a non abandonar obxectos inflamables no monte, tales como cabichas de cigarros, mistos, ou fragmentos de vidro, que poden converterse en detonantes dun incendio.

Ante calquera indicio de lume ou fume, é fundamental contactar de inmediato coas autoridades, xa que unha detección rápida pode evitar consecuencias graves. En caso de emerxencia, recoméndase chamar ao 112 para avisar o antes posible. A colaboración cidadá resulta crucial para previr os incendios e protexer o entorno natural.