Curtis aproba novas medidas fiscais, reorganiza servizos e honra a memoria local nun pleno clave
O Concello de Curtis celebrou unha sesión plenaria ordinaria marcada por acordos clave que buscan reforzar os servizos públicos, adaptar a normativa local aos tempos actuais e recoñecer figuras históricas que marcaron o desenvolvemento da vila.
Entre os puntos aprobados destaca o novo regulamento da Agrupación de Voluntarios de Protección Civil, unha proposta que contou co aval da Subdirección Xeral de Planificación e Protección Civil. O texto regula os dereitos e deberes das persoas voluntarias e establece os mecanismos de coordinación cos servizos municipais. A nova normativa queda agora en exposición pública durante 30 días hábiles.
No eido económico, o Pleno deu luz verde á modificación de dúas ordenanzas fiscais. Por unha banda, actualízase a taxa de recollida e xestión de residuos para cumprir coa Lei 7/2022, axustando os prezos ao custo real do servizo. A tarifa para vivendas familiares situarase nos 110 euros anuais, mentres que outras actividades económicas verán variacións segundo a produción de residuos e a superficie ocupada.
Tamén se aprobou inicialmente unha revisión do imposto sobre bens inmobles (IBI), que supón unha actualización do tipo impositivo do 0,45 ao 0,49 a partir de xaneiro de 2026. A medida, segundo fontes municipais, responde á necesidade de garantir “a continuidade dos servizos sociais e os investimentos clave para a comunidade”. Engaden que “este axuste é unha inversión no benestar colectivo. Con el protexemos a viabilidade dos nosos proxectos e aseguramos que Curtis siga avanzando con estabilidade e solvencia”.
Desde o ano 2014 o Concello mantivera conxelado o tipo do IBI, pero a presión derivada da COVID-19, da crise inflacionaria e do encarecemento da enerxía obrigan agora a unha reestruturación que permita manter infraestruturas e servizos esenciais. Ambas modificacións fiscais estarán abertas a alegacións durante 30 días naturais.
Outro punto relevante foi a decisión de non prorrogar o actual contrato de xestión do ciclo da auga, sumidoiros e depuración, vixente desde 2007 coa empresa Espina y Delfín SL. A prestación do servizo finalizará o 31 de marzo de 2027, e procederá a reversión das instalacións ao Concello. Esta decisión permitirá ao Goberno local reorganizar o modelo de xestión en base á nova normativa sobre augas e contratación pública.
No ámbito institucional, a Corporación aprobou por unanimidade o cambio de nome da actual “rúa Ambulatorio”, que pasará a chamarse “rúa Tío Benito do Santo”, en homenaxe a Benito Seoane Paredes. Trátase dun veciño moi querido en Curtis, que destacou polo seu espírito solidario e polas súas doazóns de terreos para uso público, como os espazos que acolleron as antigas escolas, o Centro de Saúde, a igrexa de Nosa Señora de Lourdes e o cemiterio. O Concello considera esta medida un acto de “xustiza histórica e de posta en valor da memoria colectiva local”.
O pleno do 20 de xuño deixa así unha folla de ruta clara para os vindeiros meses en Curtis: reforzo do voluntariado, actualización fiscal responsable, reorganización dos servizos básicos e un recoñecemento público ao compromiso cidadán e á historia local.