Curtis activa unha campaña informativa para mellorar a reciclaxe no Nadal
O Concello de Curtis porá en marcha esta semana unha acción de sensibilización ambiental co obxectivo de reforzar a correcta separación dos residuos durante o Nadal, un período no que aumenta notablemente o lixo que se xera nos fogares (restos de comida, envases, papel de agasallo, caixas ou botellas).
A iniciativa fará especial fincapé nos biorresiduos, buscando mellorar a súa xestión e reducir o impacto ambiental. Para iso instalaranse puntos informativos nos que se ofrecerán consellos prácticos e orientación á veciñanza.
O luns 22 de decembro o stand situarase na Praza de España e na avenida Doutor Martínez Pardo, en Teixeiro, e o martes 23 trasladarase ao Recinto Feiral de Curtis. En ambos os dous casos o horario será de 10.00 a 13.00 horas.
Durante as xornadas haberá un espazo divulgativo sobre reciclaxe e separación de residuos e realizaranse tamén tarefas informativas a pé de rúa, a cargo de persoal especializado en educación ambiental. Desde o Concello lembran que a implicación cidadá é clave para avanzar cara a un modelo de xestión de residuos máis eficiente e sostible.