Curtis acollerá o Campionato Estatal de Balonmán en Cadeira de Rodas
O Pavillón Municipal de Curtis será o escenario, o sábado 1 de febreiro, do Campionato Estatal de Balonmán en Cadeira de Rodas, unha cita deportiva que promove a inclusión e a práctica deportiva para persoas con mobilidade reducida.
O evento, organizado polo ICB Coruña, reunirá tres equipos destacados a nivel nacional: BM Parla, Inclusport CYL e ICB Coruña. A competición dará comezo ás 10:45 horas co enfrontamento entre BM Parla e Inclusport CYL, seguido do duelo entre Inclusport CYL e ICB Coruña ás 12:00 horas. Para pechar a xornada, ás 13:15 horas, medirán forzas o ICB Coruña e o BM Parla.
O campionato, ademais de destacar o alto nivel competitivo dos seus participantes, busca concienciar sobre a igualdade de oportunidades no ámbito deportivo. Esta disciplina é un exemplo de superación, habilidade e traballo en equipo, visibilizando o talento de deportistas con mobilidade reducida.
A organización conta co apoio de entidades como o Concello de Curtis, a Deputación da Coruña, a Xunta de Galicia e patrocinadores locais, que converten esta competición nunha cita ineludible no calendario deportivo galego.