Curtis acolle o Campionato Estatal de Balonmán en Cadeira de Rodas
Curtis prepárase para vivir unha emocionante fin de semana deportiva coa celebración do Campionato Estatal de Balonmán en Cadeira de Rodas, que terá lugar o sábado 1 de febreiro. Este evento, que reúne aos mellores equipos e deportistas desta disciplina, non só busca fomentar a competición, senón tamén concienciar sobre o deporte adaptado e os seus valores de inclusión, superación e traballo en equipo.
Como parte das actividades previas ao campionato, hoxe levouse a cabo unha xornada de sensibilización no Colexio de Teixeiro, onde 100 nenos e nenas de 3º, 4º, 5º e 6º curso tiveron a oportunidade de coñecer e experimentar o balonmán en cadeira de rodas. Esta iniciativa foi liderada por Lorenzo Envó, presidente de ICB Coruña, e Montserrat Santiso, tamén membro de ICB Coruña, quen guiaron ao alumnado na práctica do deporte desde a perspectiva dos xogadores con discapacidade. Os menores puideron probar a xogar sentados en cadeiras de rodas, comprendendo así os desafíos e habilidades que require esta disciplina.
O obxectivo desta actividade foi visibilizar o deporte adaptado, fomentar a empatía e transmitir valores como a igualdade e a inclusión. A experiencia repetirase cos alumnos do Colexio de Curtis, quen tamén terán a oportunidade de participar nesta enriquecedora iniciativa.
O gran evento chegará o sábado 1 de febreiro, cando Curtis se converta no epicentro do balonmán en cadeira de rodas a nivel estatal. Espérase a asistencia de numerosos afeccionados e a participación de destacados equipos e deportistas, nunha xornada que promete emoción, competitividade e, sobre todo, unha forte mensaxe de integración e respecto pola diversidade no deporte.
O 31 de xaneiro ás 13.00 horas terá lugar a presentación do Campionato Estatal de Balonmán en Cadeira de Rodas no Recinto Feiral de Curtis, da man do presidente da Federación Galega de Balonmán, Bruno López, e do presidente de ICB Coruña, Lorenzo Envó, así como coa asistencia do alcalde do Concello de Curtis, Javier Caínzos.
Os horarios dos partidos serán: 10.45 horas, o BM Parla vs Inclusport CYL; ás 12.00 horas, o Inclusport CYL vs ICB Coruña; e ás 13.15 horas, o ICB Coruña vs BM Parla.