Culleredo renovará a vexetación do paseo marítimo de O Burgo e do miradoiro da Corveira
O Concello de Culleredo, a través da Concellería de Medio Ambiente, prepara unha intervención integral para renovar e poñer en valor a arboleda do paseo marítimo de O Burgo e do miradoiro da Corveira, dous espazos moi frecuentados pola veciñanza e visitantes.
A actuación responde a unha demanda reiterada da cidadanía para recuperar as vistas á ría de O Burgo, actualmente tapadas por aliñacións de olmos de gran porte e outras especies que foron medrando de maneira descontrolada.
O proxecto contempla unha substitución progresiva e planificada dos exemplares existentes por especies autóctonas galegas de alto valor ecolóxico, como carballos, castiñeiros e outras propias do bosque atlántico. Para garantir unha intervención respectuosa co entorno e coa fauna local, aplicarase un protocolo técnico baseado en criterios de sustentabilidade.
“Queremos que o paseo marítimo e o mirador da Corveira se convertan en referentes de integración entre espazo urbano e natureza, representando a paisaxe galega na súa máxima expresión”, sinala o alcalde, José Ramón Rioboo, quen engade que con este plan de reforestación “daremos un paso máis” na posta en valor destes espazos.
No caso do paseo, a actuación desenvolverase nas zonas da chamada fase 1, nas contornas de Os Templarios e La Cros, onde a vexetación impide actualmente a visión da ría. En A Corveira, a intervención centrarase no parque da rúa Irmáns Suárez Ferrín, que combina zona verde con trama residencial.
A substitución realizarase a partir dun inventario detallado de cada árbore, no que se avaliará o seu estado fitosanitario, o risco que supón e o seu impacto visual e ecolóxico. Só se eliminarán os exemplares que presenten problemas ou bloqueen de xeito significativo as vistas ou a accesibilidade.
Os traballos executaranse fóra da época de nidificación das aves e aplicaranse técnicas de corte dirixidas que minimicen o impacto sobre o solo e as raíces das árbores próximas. Cada exemplar retirado será substituído por outro de especie autóctona, cun valor ecolóxico igual ou superior, e seleccionaranse variedades resistentes, de crecemento harmónico e baixo mantemento.
A nova arboleda permitirá abrir vistas estratéxicas cara á ría e a outros puntos panorámicos, ao tempo que se integrarán zonas de sombra e camiños. Tamén se poderá introducir vexetación arbustiva autóctona para enriquecer o entorno sen invadir o espazo.
Con este plan, o Concello reforza o seu compromiso coa rexeneración ecolóxica e a mellora da accesibilidade. “Queremos seguir un modelo baseado na sostibilidade para atender as necesidades veciñais e mellorar os espazos públicos sempre en harmonía coa contorna natural”, subliña Rioboo.
A iniciativa municipal tamén se estenderá a outras zonas do termo municipal onde a vexetación, sobre todo mimosas e arbustos invasores, colonizou espazos que deberían estar despexados para garantir o uso público e a contemplación da paisaxe.