Culleredo remata o asfaltado da rúa Domingo Sierra no centro de Vilaboa
O Concello de Culleredo vén de completar os traballos de asfaltado e reurbanización na rúa Domingo Sierra, en pleno núcleo de Vilaboa, unha actuación incluída nun plan de renovación da vía dividido en dúas fases e cun investimento global anunciado por riba dos 800.000 euros.
A intervención agora executada céntrase no tramo comprendido entre a glorieta do oliveiro e a rúa Condes de Andrade, cun orzamento de 441.601,02 euros. As obras incluíron a renovación do firme e das beirarrúas, con losetas reforzadas nos accesos a garaxes, a colocación de mobiliario urbano e novas plantacións, ademais de dous pasos de peóns sobreelevados e a actualización da sinalización para gañar en seguridade viaria.
No apartado de servizos, a rúa incorpora iluminación máis eficiente con tecnoloxía LED e executáronse melloras nas redes de saneamento e abastecemento. O alcalde, José Ramón Rioboo, defende que se trata dunha obra ‘moi necesaria’ tras a humanización da avenida de Vilaboa, que desviou máis tráfico cara a Domingo Sierra, e subliña que o obxectivo é unha ‘modernización absoluta’ da rúa.
De cara á segunda fase, o goberno local xa conta co proxecto aprobado para actuar entre Condes de Andrade e a glorieta da fonte de Vilaboa, cun presuposto de 336.414,05 euros, co que se completará a reforma integral da vía.
A folla de ruta municipal en Vilaboa continúa, ademais, con novas actuacións urbanas previstas para as vindeiras semanas, como a praza Sagrada Familia e outro tramo da avenida entre a autopista e Fonte da Balsa.