Culleredo pecha o Verán Movidiño con 78 sesións ao aire libre
O Concello deu por rematada a edición verán 2025 do programa Verán Movidiño, dirixido ao colectivo de persoas adultas, que desenvolveu un total de 78 sesións celebradas desde xullo ata finais de setembro. As actividades, gratuítas e pensadas para fomentar a práctica física ao aire libre, celebráronse en distintos puntos do municipio —Fonteculler, Celas, Tarrío, Sueiro, O Burgo e Vilaboa— aproveitando o bo tempo estival.
Como peche do programa os participantes recibiron pautas ofrecidas polos profesionais de enfermaría do Centro de Saúde de O Portádego sobre hábitos seguros de exercicio e prevención, e realizaron unha saída a pé por Celas, percorrendo parte do Rego das Xesteiras e os camiños de Ermida de Ternande. A concelleira de Maiores, Penélope López, e a responsable de Réxime Interior, Marta Figueroa, acompañaron ás persoas asistentes e resaltaron “o compromiso e o entusiasmo” coa actividade.
O programa buscou non só promover rutinas saudables —estiramentos, relaxación e exercicios básicos de fortalecemento— senón tamén ofrecer alternativas variadas de movemento e crear contornas de socialización para o benestar físico e emocional. A experiencia consolida a aposta municipal pola actividade física comunitaria como ferramenta de saúde pública e inclusión.