Culleredo licita por 461.940 euros a reforma integral da rúa Andrés Pan Vieiro no Burgo
O Concello de Culleredo deu un novo paso nos seus plans de renovación urbana coa saída a licitación das obras de reforma integral da rúa Andrés Pan Vieiro, no centro do Burgo. O goberno municipal publicou este 12 de xaneiro no perfil do contratante o concurso para executar os traballos, cun orzamento de 461.940 euros.
O alcalde, José Ramón Rioboo, e o presidente da Deputación da Coruña, Valentín González Formoso, pecharon a cofinanciación a través dun convenio de colaboración. A institución provincial achega 250.000 euros, o 54% do investimento total, mentres que a contía restante será asumida polo Concello.
Rioboo definiu o proxecto como unha reforma completa pensada para mellorar tanto a funcionalidade como a imaxe da rúa. Andrés Pan Vieiro é unha vía integrada na principal malla residencial do núcleo, que conecta a avenida de Acea de Ama con Ribados e serve como itinerario peonil cara a equipamentos como o Conservatorio, o CEIP Isaac Díaz Pardo, o polideportivo e o campo de fútbol.
O obxectivo central da actuación é incrementar a seguridade viaria priorizando ao peón. Para iso, ampliaranse e iluminaranse os pasos de peóns, con dous deles elevados. Tamén se renovarán os pavimentos de beirarrúas e calzada, adaptando a rúa á normativa de accesibilidade.
No apartado de mobilidade, o proxecto prevé modificar a disposición dos aparcadoiros no marxe dereito para permitir estacionar en oblicuo e marcha atrás, aumentar o ancho do carril ata os 3,5 metros e unificar os accesos rodados aos garaxes.
O plan inclúe ademais a renovación do mobiliario urbano con criterios de sostibilidade, empregando materiais procedentes de plásticos reciclados e redes de pesca de xestores de residuos mariños autorizados. Ao longo da vía executaranse plantacións de arborado e novas zonas verdes.
No entorno do Conservatorio crearase un espazo humanizado con pavimento de formigón sobreelevado, alumeado específico, arborado e novo mobiliario urbano. A iluminación da rúa renovarase con tecnoloxía LED e tamén se actuará na rede de pluviais, coa recolocación de sumidoiros e a conexión das baixantes dos edificios lindeiros. O Concello achega unha recreación do resultado previsto.