Culleredo impulsa un programa de Estimulación Mental para maiores
O Concello de Culleredo activará a partir de xaneiro un novo programa de Estimulación Mental dirixido ás persoas maiores do municipio, unha iniciativa pensada para reforzar o seu benestar cognitivo e favorecer tamén a interacción social.
As sesións levaranse a cabo en máis dunha decena de centros sociais, culturais e municipais, distribuídos por Almeiras, Boedo, O Burgo, Castelo, Celas de Peiro, Celas, Fonteculler, Ledoño, Orro, Sueiro, Tarrio e Vilaboa. A proposta incluirá aulas centradas no adestramento da memoria, da atención, da creatividade e da linguaxe, co propósito de manter e mellorar as capacidades cognitivas das persoas participantes e promover un envellecemento activo.
O prazo de preinscrición permanecerá aberto ata o 15 de decembro. As persoas interesadas deberán entregar a folla de solicitude nos Servizos Sociais de O Burgo ou de Vilaboa, no Edificio de Servizos Múltiples de O Burgo, ou ben remitila ao correo electrónico actividades.benestarsocial@culleredo.es.
As listas provisionais de persoas preinscritas publicaranse o 17 de decembro. Dous días despois, o 19 de decembro ás 11:00 horas, celebrarase o sorteo público de prazas no Centro Social Costa da Lonxa, en O Burgo. As listas definitivas estarán dispoñibles o 23 de decembro nos Servizos Sociais de O Burgo.