Culleredo impulsa o PXOM convocando a reunión de todas as partes para outubro
A elaboración do Plan Xeral de Ordenación Municipal será obxecto de reunión entre todas as partes implicadas o próximo 17 de outubro. O alcalde, José Ramón Rioboo, convocará para ese día a Comisión Especial, unha vez que a Dirección Xeral de Urbanismo da Xunta de Galicia confirmou a súa dispoñibilidade para esa data.
O rexedor aposta pola participación da Xunta no órgano municipal dado que é a administración que debe validar en última instancia o plan. “Queremos unha formulación garantista para avanzar”, apunta Rioboo.
Por iso, o primeiro edil reuniuse o pasado xullo coa directora xeral de Urbanismo, Encarnación Rivas, xunto coa concelleira de Urbanismo, Marta Iglesias, os técnicos municipais e o equipo redactor do PXOM. No encontro efectuouse un balance da situación actual do proceso e os pasos para seguir.
Alí concretouse a asistencia da responsable autonómica á Comisión Especial do PXOM para poder expoñer a súa valoración aos grupos municipais sobre o documento e o procedemento para seguir. Neste órgano estarán presentes representantes do goberno local, dos grupos da oposición e os técnicos municipais, ademais da mencionada participación da Xunta.
Da reunión espérase obter unha folla de ruta con prazos para retomar a elaboración do PXOM, xa aprobado inicialmente, agora que o Concello xa dispón de persoal no departamento de Urbanismo para poder avanzar no proceso. Desta maneira, poderíase aproveitar todo o progreso realizado na elaboración do plan, #de acordo con as directrices da Xunta e ás estipulacións dos técnicos. No caso contrario, empezar desde cero implicaría unha nova licitación para os traballos.
Cabe lembrar que o PXOM aprobado inicial contou posteriormente co informe contrario do propio director do Plan, unha situación que levou á suspensión temporal dos traballos, que non puideron ser retomados pola carencia de persoal suficiente na área. Agora, con máis persoal, aínda que non se dispón do número de traballadores desexado, xa é posible a nova formulación.